讀書做乜野

2007/02/26

最近辦公室閒人薯仔兄一連出左兩條長文(文一文二)講點解要讀書,身為一個經驗豐富既學生,睇完佢篇文,實在太有感覺,不得不講。

首先,或者轉下問題,究竟我想做乜野。

一月中的在為著升學的事煩惱時,唔知點做決定,同人傾計時好多時會番到一個好跟本既問題, 就係我究竟想做咩?同埋究竟我既目標係乜野?我發覺自己完全答唔到呢個問題,因為一路長大時呢個問題都未出現,小五小六時候你問我,我會答想入名校。中四 中五時你問我,我會答我想原校升中六,因為可以玩。中七時你問我,我咪話中大港大囉。一路都冇問題,直至係快將大學畢業果一刻⋯

點解會咁?且聽白頭宮女話當年⋯

在 一九六七年暴動以後,港英政府發現街上面有太多太多無謂既人係度行行企企無所事事,佢地冇乜點讀過書,亦都冇錢讀書,終日溜連街頭,唔知做乜好。佢地窮, 有一些係走難落黎,見到班鬼佬係度管住的中國人,搞到百幾年來都抬唔起頭做人,國仇家恨。咁,佢地咪得閒掟下汽油彈,做下土製波羅,搞下野,睇下班英國佬 點收科,橫掂在於佢地黎講,they have nothing to lose。

所以,港英政府就創造左九年免費教育呢項德政,立法規 定所有適齡兒童都要入學校讀書,將所有無所事既人全部好似監倉咁放係學校裏面。咁,起碼可以令到日頭相對地安寧。同埋,成個教學制度都係同的學生講你要讀 書考試攞高分,考得好就升中學,考得再好就讀埋預科,差少少就俾間職業先修你讀住先,起碼有一技之長,或者有朝一日可以起到紅磡體育館。讀預科那班,咪再 俾多個目標佢地,就係讀大學。七十年代讀完大學就已經飛黃騰達,大把錢大把世界,還可以分享到英國人一向擁有既優越同權利,咁幾好,最叻最識得搞事果批仲 收埋入建制裏面,金耀基稱之為行政吸納政治 。就係咁,玩政治一流既英國人就整左一個咁既遊戲俾港九新界十八區既黎民百姓玩。重要既係佢從來都係咁塞野入你度,set好曬rules比你玩,佢從來冇叫你自己諗過你自己想點,佢亦從來冇叫你諗下這些遊戲的規則合唔合理。

陳冠中在《我這一代香港人》有確切的描述:「⋯當時是怎麼樣的學校呢?是一條以考試為目標的生產線。⋯他們可以很快很聰明地學很多東西,但轉變也很快,過後即丟,而且學什麼、做什麼是無所謂的,只要按遊戲規則,把分數拿到。」

我相信我也是陳所述的其中一人,會考高考甚至乎是大學裏的考試,甚實都依著一套遊戲規則,花些時間,就能獲取一個使人滿意的分數。但是,從來冇人問過我點解要玩呢個遊戲?唔玩得唔得?

唔讀大學得唔得?

我時常舉Steve Jobs同Bill Gates做例子,佢地夠大學未畢業啦,邊個夠膽話佢地唔得、邊個夠薑話佢地籮底橙?

當然啦。有佢地咁醒就梗係好。作為一個平凡人,好似楊千嬅 咁講:「改變唔到個規則,咪唯有跟住玩,又或者唔玩」。睇住讀完大學既人全部都搵到工,人工一萬蚊左右啦(記住呀,零六年人口譜查先係話香港既人工中位數 係一萬蚊),又睇住classified post份份工(除左清潔同樓面)都要大學程度,咁你讀唔讀?我就一定讀。好似薯仔咁講,預科加大學夾埋起碼五年,用五年時間去換黎日後多的選擇,梗係讀 啦。再加上而家副學士橫行,得中五程度可以揀既工真係少之又少。

工作係乜野,可以純粹係一個用自己既青春同時間去換錢既程序。有錢(我不 是說要大富大貴,起碼要經濟獨立,支持到自己既生活)先可以做到其他野,又或者pursuit其他既興趣。唔係話中五畢業出黎搵野做就一定死路一條,之不 過,相對地,如果讀得上去的話,選擇讀大學既人條路會好行一點。

我都好唔鐘意將讀書同搵錢劃上等號(雖然我都試過想努力讀書攞獎學金去旅行,點知失敗),但如果我地將做問題咁睇,諗落會舒服些少:

讀完大學可以換來一個相對地經濟獨立既生活,從而可以做自己想做既野。當然有人可以話一個星期做足六日朝九晚七仲邊有時間可以做自己野,但,其實,在香港地,一個普通大學畢業生,做parttime搵幾千銀已經夠自己駛同埋有好多自己時間。

無論俾我揀幾多次,我都一定會讀大學。

讀書或者讀大學唔係為左錢,而係讀大學係一個好好既時間去做自己想做既野。一般來說,大學有三年,好快就過。我跟同學們傾計,佢地都好同意,大學裏面既考試,好多時都係跟緊一條80-20既 法則。即係,考試要攞八成分好容易,好多時只係需要花兩成既氣力。但係,要再進一步攞到餘下果兩成既分數,就係用埋餘下果八成力,即係要做到最勁最勁果個 人,要花既力氣實非同小可。好似講遠左。總而言之,大學畢業唔係好難,如果只求安安穩穩咁合格,其實花既氣力唔係好多。甚至可以少過高考。咁淨番落黎既時 間,就係俾你發展潛能同興起既時候。

我有幸可以讀大學既時候玩過好多野,因為有些時候如果淨係讀書實在太過得閒太悶。而家畢左業,都悔恨 當初玩得唔夠多野,起碼,我冇試過創業。我覺得讀大學就係一個咁既地方:有這樣的一個考試遊戲,你過左會考,又過埋高考,獎品就係三年政府養你讀大學既時 間,果段時間你可以好free好hea,亦好可以玩好多野試好多野學好多野,就係因為你有時間,點用你自己話事,用得好用得唔用同自己負責。

香 港教育既最大問題,就係呢個制度好少問學生究竟佢地想點。當年英國為左方便管治,咪叫的人勤力的番屋企讀書,將的人焗曬番屋企,咪冇人搵事囉。如果小學一 年級就問佢地想點,又叫中一學生批判下現時制度之不公,中五都未到就肯定出曬黎遊行示威抗議罷課啦!精甩尾既英國佬又點會咁傻。咪由得你班友仔傻下傻下 咁。大學既美好時光,亦因為在大學裏面冇人會叫你做野,而白白錯失左。久而久之,成個社會既風氣就係冇乜人會問自己想點,大家都係想紮紮實實跟足規矩玩。

入大學唔等於有前途,只不過係令自己日後多條路揀。入大學,重要既係可以換來幾年時間,可以任得你用,點玩都得。

最後最後,跟薯仔兄一樣,想講番句。如有中五grad之朋友經過此blog而覺得被冒犯,本人在此深表歉意。

廣告

8 回應 to “讀書做乜野”

  1. 空中飛人 Says:

    和你一樣,再給我選,還是會讀大學,那是最浪漫、最大衝擊的年代,一切都是新鮮的,大學的生活(環境呀、朋友呀、讀書呀、宿舍呀)給自已感情上很大的自由,如果那時只將心機放在搵錢嘛,點兒浪費。又,能延遲幾年才工作,延得多久就多久,很逃避是不,嘻。 😛

  2. 70/F Says:


    不愧為馬料水人喎
    > 讀大學係一個好好既時間去做自己想做既野
    好似金耀基都講過d差唔多既野


    俾心機呀
    小 justin

  3. yipjustin Says:

    空中飛人:對呀,大學裏,很多東西都很自由,做很多事也容易得人同情,就算做錯事也容易得人原諒。很逃避?對,同意極了。所以我還在學校裏工作。

    七十樓姐姐:多謝呀!我都好似在學校裏聽人講過類以的話,那時候總不以為然,蘇州過後才懂得珍惜。

  4. gordon Says:

    香港教育唯一最成功ge地方就係造到一批捱得ge學生(如果你有命捱完大學的話),出黎點俾d老細點糟質都頂得住

  5. cheryl Says:

    comment前交代一下個人小小background,廷有趣,就是我過不了AL,不過其實都「叉左半隻腳入去」某大學,但又沒有去唸。從初時沒有企support下我就這樣去了打工之後跑掉了…

    跟你提過大學都不外乎入場券。假設我當年順風順水入了香港大學,或者倒頭來我不會有那麼多閒情逸緻珍惜。都是跟你所講,教育一直沒有叫人諗自己想點。直至到覺得自己「死喇,撻左q,唔掂」先至去figure究竟我想要乜。

    學校絕對係一樣institutionalize的工具,而且仲一早將你地分晒grade。教育原意係俾d窮人有機會上位,似乎而家咁白熱化既香港真係好不幸,冇呢支歌唱。

    所以有些人不貴吹灰之力就入左government&law,有些人就好辛苦先猛車邊,畢業出黎都係天壤之別。教育過程並冇令人同等化了。

    其實在大學學的,你自己有心去學一定可以翻轉個library學晒。問題係,你有左一個機會俾你咩都唔做有人俾錢你去學野。不過又有幾多人珍惜,又有幾多人覺得好inspiring咁?

    大家咪又係戅居居,淨係想搵多d錢,跟住又抱怨生活如何如何。因為從來冇人話我地知條路有第二個,或三、四,什至無限個走法。

    可能有一天搵到些錢,抬頭一望中環的天空,都係渴望有d錢跌落黎。

    以前我會覺得這是必經的生活,現在我只知道我不可以一世都停留在一個地方。

    為什麼要養家,什至還你的債?為什麼要生兒育女? 這就是人生嗎?人生就是人家說這是就便是嗎?

    大機構大行業都在同樣地institutionalize各人。結了婚有美好家庭的就是成功商人、成功領袖。可是現實中成功的proportion有幾多?在美國divorce rate是50%,香港也3日唔埋倫常案,但人們仍在催眠自己世界上有perfect的東西!!

    對不起,廢話了。預祝美國之旅愉快。

  6. Justin Says:

    Gordon: 我們的學系亦如是呀。我常常對人說,在這裏畢業的人,如果佢既成績係ok既,佢一定好捱得。

    Cheryl: 唔知你有冇睇過套戲叫《飛越瘋人院》,其實,在某種意義下,我們的學校就是一個瘋人院,自幾歲開始就將一張又一張既白紙送入去,倒落一個預設既模到,幾年之後,就倒番出黎,倒番一個又一個既正常人出黎。

    又或者咁講,唔順從社會主流價值既人好多時會被視為癲人,如果三十歲仲遊手好閒日日呤書作樂既人一定會俾週遭既人鬧頹廢。

    同時,報紙雜誌又時常標榜一些所謂的成功人士,做左一個“成功“既形象出黎要人跟。但,點解唯獨有頭有面有錢有地既人先叫做成功?

    就係咁。還有兩個多月先起飛,到時先講都未遲!

  7. 薯仔 Says:

    Justin 兄

    薯仔都係馬料水人呢。。。。我就係鐘意馬料水果種好自由既風氣,你想靜又得玩又得。。 。

    可能一開始英國人就係為左等班香港人唔嘈而設計個教育制度,但係以家既香港,我睇唔到有人可以帶我地走出呢個困局。。。

  8. Justin Says:

    薯仔兄:
    原來係咁。好似附近的人不是來自美加,就是來自馬料水的。

    我都睇唔到有。因為,那些高高在上的,正正是英國制度裏的既得利益者,佢地根本冇incentive去改變。苦的,只是我們。


發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: