無聊野之八—濫發鈔票

2007/04/07

講明先,呢度係百無禁忌既,如果唔鐘意聽奇怪野,就,嘿,唔好睇呢篇。

琴日去拜山,响山腳度買花時,見到一疊又一疊既銀紙啦,面額仲好大添,發鈔銀行好似係冥通銀行。

其中見到既一疊,竟然係一張五十億。呀李生咁Q有錢都係得幾十張。當然啦。邊個話果度既幣值同港幣係一對一既?

好。就等我講下地府既發鈔問題。

傳說中地府既資源少,但係下面既人又愈黎愈多喎,咁,在需求增加而供應不變的情況下,物價當然會上升啦。咁,為左令到先人可以繼續享受原有既生活水平,就只有燒多的錢佢地洗。問題,就出現响呢度。

當人人都燒錢落去時,地府裏面,出現左愈黎愈多錢,每個人都好似有錢左咁。原本下面既人覺得一部psp淨係值二百億,但係,忽然間人人既口袋裏面都多左錢,就會覺得二百五十億都係affordable,於是,賣psp既人就因為想maximize自己既利潤,就會抬高價錢。

賣psp既人識加價,賣ndsl既又點會唔識。賣ndsl既識,賣ram既人又點會唔識。久而久之,成個地府都加曬價啦。

咁,大家既口袋裏面係多錢左,但係,外面既野又貴左喎。就好似,明明加左20%人工,但係豬柳蛋漢堡同一時間又貴左三蚊,即係,冇分別。

又或者簡單黎講,其實,錢既多少,都係一個相對既價值黎者。全世界人都多錢左,同,全世界人都少錢左,其實一樣者。

正路一疊銀紙有五十張。而一疊冥幣應該有二千五百億。

在山腳,一疊廿蚊啦。而,同一時候,响大角咀,只係十蚊。即係話,個transaction cost可以超過十蚊。咁,即係話,一疊銀紙既價值,可以低過佢既transaction cost。個情況就好似,你去借大耳龍,借一萬,佢七除八扣後,只係俾二千你,但係依然當你借左一萬喎,果八千蚊,就係transaction cost。

即係,當咁大疊銀紙既價值連由旺角到和合石的運費都不如的時候,大家可想而知,在地府陰司裏,貨幣的功用是何等低微,與其燒錢,倒不如燒多兩部nokia,以物換物可能還要著數。

呢個故事教訓我地,早幾個星期市面上出現左咁多假金牛,問題就係响呢度喇。當獅子銀行同埋金管局容許大量假金牛流入市面,情況其實同我地係咁燒野落去下面咁,導致成個貨幣制度既崩潰。所以呢,街上面既金色銀紙,最近失曬踪,就係咁解。

廣告

11 回應 to “無聊野之八—濫發鈔票”

  1. winson Says:

    正~~!!

    不過唔知咩係transaction cost…

  2. 星兒 Says:

    哈哈,好好笑!但,你講既呢個case係咪只適用於有"錢"收的一班鬼呢?孤魂野鬼及無子孫(包括個d已經唔知第n代的祖先)燒俾佢地既一班又唔係咁講喎,而且,有"錢"既呢班又係咪佔多數呢?就係呢點,全世界呢個term就已經唔成立啦!

  3. c Says:

    其實呢個問題,係咪每個拜過山既人都諗過架呢?
    我今年未拜山
    都係要叫媽咪買野實際過買銀紙
    哈哈!!

  4. paul 仔 Says:

    咁直接燒 psp ~燒樓~~燒結他~~燒妹仔~~燒野食 落去未唔會通脹 law ~

  5. gordon Says:

    可能地府都要抽稅呢,d人收到30億,可能要被人強制收番29億,跟住地府將d錢俾左d冇人燒俾佢地ge鬼(相信鬼佬佔左八九成),有淨ge咪銷毀lor

  6. 熊貓王 Says:

    在另一個網站跟朋友說起,其實燒實物也有問題。例如燒PS3、wii、DVD機落去,但唔燒碟,先人可以玩甚麼?好了,燒埋碟同說明書,但又唔燒條AV線,就算下面有電視機都駁唔到線,玩乜鬼?
    燒金銀?下面的金銀應該都多到唔可以保值。燒飛機但唔燒飛機師?有幾多個先人懂得駕飛機?有人覺得燒信用咭、八達通就唔駛燒錢,但銀行戶口無錢點碌咭?唔通人死了都仲要欠銀行咭數?

    有很多技術上的問題,仍有待解決。^^

  7. Justin Says:

    關於呢篇,嘿,好好玩的,我仲有野想講,等多兩日,我寫埋佢。

  8. kenka Says:

    我直頭覺得, 根本冥通銀行一早就會被閻王判為非法銀行, 銀紙通通非法, 由佢自己發行佢自己既貨幣, 就一天都光晒啦

  9. Justin Says:

    Kenka::: 嘿嘿嘿。你睇清楚啦!!閻羅王係冥通銀行CEO呀!!XD

  10. One Says:

    唔知大家有沒有留意, 冥通銀行的行長係閻王, 副行長係閻羅. 我仲發覺紙扎舖仲有存摺(即紅簿仔), LV袋, McDonald的happy meals, etc賣. 除咗叫阿姐執咗一份"必備"拜祖先的物品, 我亦加碼買咗好多"一萬億"的鈔票, 亦有美金及人民幣俾d先人.

  11. kenka Says:

    死撐mode: 閻王話, 地上果d人畫得佢咁out, 溫總尚且唔會咁老土, 閻王見到佢個樣畫成咁當然唔收貨啦


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: