最佳損友

2007/04/25

img_1745.jpg

CK火鶴兄都近來都寫過關於朋友,唉,朋友,有時呢,覺得真係朋友係好難keep囉。

細個時候老豆同娘親有一日忽然間好認真的同我講,要好好地識朋友,尤其是在中學裏面,大家冇乜利益瓜葛,傾得埋玩得埋既就係朋友,第二時大個左,你會知到最能夠信任既,就係那些人。細個時候或許會不以為然,但日子耐左,大個左,對人對自己既盤算亦多左,能交心就少了,開始好認同兩老講既野。

中五時候時常一大班同學走堂落佐敦打機去西九龍踩冰,放假時候上我屋企燒野食再出街蒲等天光但唔知為乜,果時以為十幾人時常走在一起係好正常既事,但,過左中五果關,有些人番唔到黎,見少左,漸漸就疏遠了。

唉,然後,同樣地,好似CK咁講,另一半與另一半夾唔黎,又少左一些。

漸漸地,淨番落黎,可以講曬真話既,唔得番好多個。

大學裏面唔係話識唔到傾得計既朋友,但,好可能係自己懶係以為成熟左,好有機心,同人講野時好多時會番過度過,驚住俾人攞自己著數,又好多時會有野收埋唔講,又或者收得埋到連自己都唔記得左,有時傾計傾到某些位置,總會有點點保留。又或者,唔係話唔信得過佢地,但好多時要從小時候講起,又或者要講左好多背景資料先,咁好多時咪唔想講咁多囉。

又,或者,中學時候同其他人既比較唔多,就算有都唔係前接競爭黎,校內既獎有獎都輪唔到自己,而公開試係同外面既人比較。相對大學裏面,大家讀埋同一科,考同一個試,拉同一條curve。又好似做煙腸時候咁,話就話大家好朋友者,但,唉,大家可嘗唔係爭緊果幾個高薪厚職,點可以太過交心呢?在利益面前,好難做得成真朋友。

又又,可能,跟大學同學冇左跟中同那些茫茫然一齊糊混過努力過既感覺,感情冇咁好掛。

又又又,有句歌詞話,「解散後 各自有際遇作導遊」,曾經好傾得埋既,亦都會漸漸疏遠了。

當下最怕既,係,同學們都剛剛離開了大學,進了社會,各自有路走,怕有朝一日,如火鶴兄所言,大家生活在不同層面上,話題少了,也不太投機,連僅餘的幾個,都失去。

另,好鐘意好鐘意呢首歌

廣告

29 回應 to “最佳損友”

  1. 70/F Says:

    你九華架嘛
    梗多中學損友喇
    (我都好多中學損友,黃金時代呀)


    嘿!
    我呢幾日,真係幾仆街(

  2. 70/F Says:

    丫點解無左一半留言架
    嗚嗚連你個部落都蝦我~

  3. 火鶴 Says:

    呢首歌我都好鍾意, 因為好有感觸.

  4. 火鶴 Says:

    咁啱呀70, 睇吓我哋嘅留言時間
    見你攪成咁, 都知你仆街架喇
    等我扶番你起身啦

  5. 提摩費 Says:

    “又好似做煙腸時候咁,話就話大家好朋友者,但,唉,大家可嘗唔係爭緊果幾個高薪厚職,點可以太過交心呢?在利益面前,好難做得成真朋友。"

    Justin , 你講我呀?

    我一早就輸左俾你la, 仆直哂, 根本我都無同你爭過, 咁做到真朋友嗎?

    係 , 我最真的朋友都是細細個就識,的確同佢地講咩都得
    不過,唸唸下,我好多時都會同D ”樣都未見過/男定女都唔知" 既網友講好多心底話.講完,我反而又覺得好舒服.

    我偶像黃子華唱過一首歌”關老三" , 黎彼得填詞,挺有意思
    由其係男人同男人之間,好多時就係咁

    中間chorus
    “我怕你披肝瀝膽 我怕你夾硬死撐
    我怕你拍心口叫共患難
    我怕你笑得淒慘 我怕你喊得摧燦
    我與你無乜瓜葛是是但但"

    最後一句
    “無lung就最襟玩…"

  6. c Says:

    我爸媽無咁同我講過,不過一個中學miss就講過同一番話
    感覺上
    我覺得你係非常珍惜友誼同埋
    好喜歡同人建立關係

  7. gordon Says:

    阿媽早就同我講過類似ge說話,當冇利益衝突ge時候,所有人都係好人,一有利益衝突就bye~

    或者經歷同其他人有d唔同,好難得先係大學搵到幾個交到心ge朋友,so…死人我都要保住呢幾個人,管它什麼利益唔利益,會唔會出賣我

  8. Justin Says:

    70: 那時候, 一計都不會計得太多,好玩就是。很懷念那些日子。

    火鶴:這首歌的詞實在很好,唯,旋律悶了一點。

    Tim: 係,你係其中一個。基本上人人都係。去到果個位,就算我唔去算住人,人地都可能會算住我,咁,就唯有自己先退一步。在那個位置,好難做到好好朋友的,畢竟,在利益面前⋯⋯跟你吃飯跟你吹水時也許會說過些心底話,但,有些,卻從沒打算講,唉,還是那句,在那個位置,很多瓜葛,很難做真心朋友。

    另,嘿!!我都有黃子華果隻碟!!

    c: 對呀!我很珍惜可以說真話的人。
    和,如你所說,好鐘意跟不同的人建立關係,因為,覺得,三人行必有我師(好老土添!!!),跟人傾計,總能從別人身上學到一點點。

    Gordon: 冇錯呀!可以交心的,就點都要保住。人愈大,可以交心的人就愈難搵。

  9. cheryl Says:

    唔… 我自己有感覺,大家都可能因為個大世界太多事,唔得閒敷衍你呢d無聊人。尤其我唔係成日見到以前d朋友,令我都幾感覺到人情冷暖….. out of sight, out of mind是真的。

    雖然我好重朋友嘅,不過佢唔care我我都唔會點再放時間落去lu。有d直情係piss off我添,心都死埋。唯有睇開d啦,識多d新朋友都唔錯吖。舊嘅唔去新嘅點嚟??

  10. 米搞 Says:

    我反而覺得人大咗,因為工作佔去大部份時間,開始只會同一啲志趣相投的朋友保持見面,亦因此與不少人變得梳遠了。

    友誼是需要時間建立的,當大家每天只四小時的睡眠時間,又怎可能再交到新的知心友?

  11. 70/F Says:

    丫我估我鍾意你呢
    係因為我地對交友有差不多的領悟
    所以
    我同你
    差這麼三數年
    仍然可以一見如故 (又當然,九華……)

  12. 野孩子 Says:

    我既「朋友」,多不勝數。

    而「知己」,
    早兩年有四個,今年得番三個。
    其實,
    得一知己;死而無憾,我地失望,係因為我地太貪心。
    年紀越大,你越會明白,現實,本來就係咁殘酷。

  13. Patrick Says:

    好一句「得一知己;死而無憾」!

    與其有數百個「朋友」,倒不如只有一個可以交心的「知己」。

    我呀媽都有同我講過,返工見到的只是「工作伙伴」,所有的關係只係建立係「工作」上。

    PS: 最佳損友我都好鐘意

  14. Henry Says:

    睇完覺得唔知點咁。

    “又好似做煙腸時候咁,話就話大家好朋友者,但,唉,大家可嘗唔係爭緊果幾個高薪厚職,點可以太過交心呢?在利益面前,好難做得成真朋友。”

    唔知係我純真定幼稚定蠢,我個年做煙腸時,真係無諗過爭咩或有咩利益沖特。就算in完個日,同另外兩位煙腸一齊食tea吹水,心亦想住希望大家都入到。

    其實係咪可以放開d呢?
    倒番轉,係咪唔交心就有利d呢?
    唔知,可能我純真或幼稚或蠢

  15. TK Says:

    有d 朋友,係要靠距離去維繫的
    太接近,知得太多,各種負面想法因應而生 (嘖!原來佢咁架!)
    有時同紅顏知己傾訴,勝過同另一半講話
    就是因為紅顏知已多了這麼一段距離
    諷刺的是,因為好像能彼此了解,慢慢大家又縮短距離成為情侶
    拍拖後,昔日明白事理的紅顏知己,為何突然變得這麼討厭?

  16. Justin Says:

    Cheryl: 嘩。你就講得輕鬆。。舊朋友之所以珍貴,就係因為夠舊。

    米搞:冇錯。舊朋友都是好朋友,是因為大家都經歷過一些事。都需要很多很多時間。

    七十:嘿嘿!你次次都講九華,查實呢,我都仲未知你跟敝校有咩關係⋯⋯

    野孩子:唉。這是我不想接受的現實呀。

    Patrick: 我都覺得,普通的朋友,係好容易識既,只要你有一定程度既溝通能力。但,要好的朋友,就,唉,超難。

    TK: 很同意。係唔係真係睇得太清楚反而冇咁好呢?唉。

  17. Justin Says:

    Henry:
    那麼你一定是個好人。

    記得我初做煙腸的那個暑假,初頭還好好地既,大家還有講有笑,但,去到最後尾果兩個星期,好似,好多人與人既問題出現囉。其實,果時,那些問題都不太關我事,但,那一次,是我人生裏第一次經歷那些情況,已叫人心驚膽膻。

    講野唔能夠講得盡,我覺得就係交唔到心。例如咁,我對公司裏一些事有意見,說了出來,就怕一日會流進不適當的人的耳中,咁,就會零願唔講。那年在投資公司裏做煙腸,我比平時少說了許多話,就因如此。

    或者咁講,你跟那兩位煙腸本身太利害,不愁沒好出路,自然放得開。

    就好似阿Max咁(你應該聽過佢既事蹟),佢夠叻,做人依然可以好豁達。

    所以,我欣賞你,因為你好叻,也因為你是個好人。

  18. 野孩子 Says:

    小Justin,

    就算係知己,都有每一個知己既禁忌,
    就係要保留呢一點點既距離,先至可以成為知己。

    叻既人永遠知道幾時要「收」,因為,
    收唔切就會撞牆,收比放更重要。

    人與人之間相處,無人可以幫你,撞得板多,自然明白。
    重有一樣,你重年輕,你輸得起。

    過來我果便,點首歌過你聽。

  19. cheryl Says:

    咁唔係點,都努力過囉,人哋唔俾面,大家又唔係好夾,唯有投資係新嘅度囉。舊朋友最大目的都係話當年啫… 大部份時候除咗講呢d都冇咩特別大家都有興趣嘅話題喇….

    你走咗之後可能都會有咁嘅feeling….. 人真係好善忘o架

  20. 小笨紀 Says:

    初次在這留言…睇完文章內容不禁令我禁入黎睇下那19多個留言〔希望我趕得切做第20個…〕

    其實有冇諗過要知己黎做乜?點解需要一個知己?而知己係您生命中會係一個點樣嘅角色?

    在我而言,我不需要雙向的知己,我只需要單向的知己就已經足夠了。一個完全知我諗咩、我有需要的時候可以幫到我、我迷惑的時候解救我、我走錯的時候帶領我,那便是一個我的知己,但我亦知道每個人都有自己的私人空間、秘密,如果佢覺得佢嘅秘密係唔可以同我分享嘅,咁咪唔好講我知,無理由我要因為佢係我知己而我要迫佢做番我嘅知己,又或者可能對方根本沒有知己的需要。

    當然,要成為一個人嘅知己係需要一段好長嘅時間去了解、去聆聽、去相處,若您有心要成為別人的知己或要別人成為您的知己,首先就要把自己生命中其中一段時間分配俾佢。

    要有信得過嘅朋友並唔難,只要您信就有,可能我太易信人,因為我係用自己嘅感覺去決定信唔信一個人,若果我信左一個人,就會毫無留保咁慢慢將我自己嘅所見所聞甚至係我自己嘅事都講晒俾佢知,我請人嗰時都常常掛住一句野係口邊「疑人勿用,用人勿疑」,搵知己亦都一樣。我信知己,所以我講過好多野俾知己聽,只要嗰種感覺仲係度,嗰個人依一世都仲有機會成為我嘅知己,我唔擔保個知己會唔會突然炒左,將我啲野爆晒出黎俾人聽,但至少嗰種感覺係曾經有過,而我依一生都會記得。

  21. Justin Says:

    野孩子:謝謝你的介紹。我諗,識得耐果的,大概都係因為互相清楚對方既禁忌,關於新相識,好多野唔敢講,就係怕錯踏中禁忌。

    Cheryl: 唉。你最後果句講中曬啦!!!而家班frd,個個月都見,但,日後,都唔知會點。

    紀:我好同意你講肯信就有。我覺得,肯信,既係覺得日後佢唔會爆晒自己既野出黎,當然,呢的野,冇人可以肯定,但,信一個人,起碼,係呢一刻覺得佢應該唔會爆自己野出黎。但,慚愧的說,相對你,我比較唔容易相信人。唉。

  22. Vincent Says:

    我都好鍾意呢首歌, 完全係現代人最現實既寫照

  23. 野孩子 Says:

    小Justin,

    〈305〉友誼的平衡 —— 有時候,在我們同另一個人的關係中,如果我們在我們的天平秤盤裡放上幾克不公平,友誼便恢復了公平的平衡。

    〈312〉補償手段 —— 如果我們讓另一個人遭受了損害,那麼給他一個拿我們尋開心的機會,讓他個人得到補償,甚至贏得他對我們的好意,這往往就足夠了。

    摘自《人性的,太人性的》第一卷 —— 尼采 (楊恒達 譯)

  24. 余若虛 Says:

    朋友既野,人夾人緣,唔可以強求架。與其好似有D人做到自己相識滿天下咁,我寧願真心去交幾個知心好友。如果大家啱咀形,即係有共同嗜好呀、理想呀、思考方式呀咁咁…呢段友情就更大機會keep耐D喇。若虛都有朋友識左十幾廿年,感情仲與日俱長。

    人大左要認識新朋友,就要投資好多時間去建立最基本既野。人大左有機心(就算你真係無人地都有),被人出賣過亦知道防人之心不可無,大家都步步為營既時候,要建立一段友誼就唔容易。如果憑感覺去決定,或者十個裏面會搵到一個一世既朋友,但亦可能十個裏面有一個出賣你既朋友,隨時要你一舖清袋。

  25. Justin Says:

    Vincent: 對呀!
    野孩子:嘩!尼采!聽朋友講得多,但還沒有機會涉獵。
    余若虛:做到相識滿天下,其實都係為左工作上方便者。但,就如你所講,去到唔開心時,就一定係番到佢知心好友果度。
    唉,就係那種害怕一鋪清袋既感覺,使人步步為營。

  26. 小笨紀 Says:

    其實我對人係靠感覺,所以好容易呃到我去信一個人,或許對得人多,現在對人的感覺比以前強烈了,所以比較容易分到哪些人炒哪些人掂。

    講真,人一世物一世,到最後您都係乜都帶唔走,又何苦執著在那些感覺上。在您身邊要找到一個信得過的人並唔難,只在乎您肯唔肯行出第一步。

    如果我話俾您聽香港幾百架巴士裡面,總會有一架會炒車,您搭左佢,您就會一舖清袋,咁您係咪以後都唔會搭巴士?抱著懷疑論去做人並沒意思呢,電視劇都有做,身邊最親的親人都可以出賣,莫非您就連親人都不能信任嗎?

    我的個人見解:
    世界沒有一個十全十美的人,葉繼寬都可以成為別人的知己良朋,為什麼您就不可以有一個真心的知己?感情依家野,沒有任何法例的條款限制,沒有白紙黑字的合同契約,一切都只靠一個「信」字,無論愛情、友情都一樣,若當初您的父母沒有這個「信」字,今天就沒有您;若當初我與知己沒有這個「信」字,今天就沒有這樣子的我。

    正如我常說的「有風險先有進步」同「命運永遠都掌握係您自己手裡面」,您就慢慢想想吧=)

  27. Lo Says:

    >>justin
    唉,忙到七彩,遲咗來發表愚見,我都想放低我嘅兩毫。
    我同意你呀。我都覺得當大家有利益衝突時,尤其名利(及女色),一個處理得唔好,幾咁老友都係咁先,所以盡量都費事將名利扯到埋來。

    當然,有時你有機心人地無,你唔可以否定呢種可能...
    因為我都試過差少少犯大錯...

    >>紀
    同人交心,同埋親人其實都係一樣,都係講個「信」字,的確係無白紙黑字的合同契約,我覺得情況係因為同人交心跟住比人冼到「攤攤腰」,就會印像好深刻,要再短期內去信其他人,難D,「見過鬼仲唔怕黑咩」,而且樓上提到,呢一冼可能係清袋戈隻。咁就算之後有人對呢個人好,要諗到佢有機心都好唔難。

    撞板呢,一野就經已好應㗎嗱,兩野?...

  28. Justin Says:

    紀:
    應該咁講,唔係話下下都會俾人一鋪清袋咁嚴重。但係,對於唔係太熟既朋友好多時講野都會有保留,尤其係果的野係關乎另外一些正在生存既人,我怕我講左出黎既說話會輾轉流到入唔適當既人既耳朵裏面,於是,去到某我位我就寧願收口唔講。

    我信得過既人,大概就係我相信佢唔會爆既野出黎那些囉。其實,又唔係話咩爆大鑊咁嚴重,但有時一些我take it seriously既事,人地未必覺得係咁,人地可能唔覺得順口講左出黎,但,可以對我影嚮好大。

    唉唉唉,即係咁,世界上我信得過既人可以同佢講野既人暫時十隻手指都數唔曬,我好多時只係對一些跟我有利益衝突既人有懷疑者。

    我同意你說要找個信得過的人唔難,但,都係果句,最好係「冇la lung」的。

    Lo:
    唉。所以我有時候好怕同好友有甚麼競爭,尤其係雙方都喜歡勝利既情況,就更加想避免,輸左個朋友,好唔值得。

  29. 小笨紀 Says:

    或許我就是那些公私分明的人…=)


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: