她約我去迪迪尼

2007/05/24

img_2420.jpg

一、嗱,唔好同我講《迪士尼不是樂園》,我都知店鋪裏面賣幾十蚊美金既公仔全裏都係中國大陸既同胞月薪得幾百蚊有血有淚咁做出黎,我都知扮緊唐老鴨果位演員心裏面好可能係小緊我,之但係,我又聽唔到又見唔到,又俾左幾百蚊入場,淨係當買個歡樂得唔得呢?

二、香港開迪士尼樂園時新聞勁多,網上也多見不同關於迪士尼內部發生的事,亦有主題公園裏既設計(尤其係唔俾公眾見到既部份),好細個時屋企人都帶過我去迪迪尼,但那時太細,傻頭傻腦的只顧著玩小飛象和跟米奇拍照,其他事都沒有機會細想。呢一次,倒引發了不同的思考。

三、未來世界。迪士尼有一個部份叫做未來世界,叫得做未來世界,就梗係展示一些未來既事。例如太空船、火箭呢類好吸引五至十二歲既小男生既東西。細個時候睇,梗係誘發無窮幻想,起碼會諗第二日大個左我有冇機會坐太空船去獵戶座打獵,又或者係十年之後會唔會世界上面既汽車都唔使有輪而會浮响空中。那時我七歲,十幾年時光飛快咁過去,今日既我當然完全知道那些是小朋友的幻想,但這些幻想好多時都係外界給予我,例如係迪士尼樂園既怖景。今日,遊覽迪迪尼,看見這些很有歷史價值的機動遊戲,感覺就好似睇緊閃電傳真機咁,曾幾何時覺得係好科幻既東西,此刻只覺得係陳年既想象。機動遊戲既建築物既設計十分之八九十年代,我在想,如果換在這天,主題公園既設計師又會點樣設計呢的建築物?

四、細個時候覺得迪迪尼既機動遊戲好刺激,覺得要好大膽先可以玩得黎。今日玩完覺得不外如是,唔知係因為當年道聽途說,但自己又冇真玩,以為真係好好好刺激;定係因為自己真係大個左响唔同地方玩過好多其他既刺激遊戲於是相對地覺得迪迪尼冇乜等別。不過諗落,迪迪尼好可能係特登令到佢地既遊戲做得冇咁刺邀。原因好簡單。先係比較下香港海洋公園同洛杉機迪迪尼既機動遊戲對遊客既高度要求,海洋公園要求既係一百二十幾厘米,而迪士尼要求既只係一百零幾厘米。假設兩地既安全標準一樣,海洋公園既遊戲應該比迪迪尼既刺激。迪迪尼既主要對象係小朋友,這個好明顯,十歲以上既小朋友佢已經收大人錢,如果佢既機動遊戲有較高既高度要求,自然會令到有一部份人因為玩唔到機動遊戲而唔入場。所以,佢為左吸引多啲細路入場,寧願唔要比較刺激既遊戲。

五、上網番查以前迪士尼既相,發覺初頭既迪士尼冇咁大,但問題係,洛杉機既迪士尼為位城市裏面,唔似得奧蘭多果個咁係位於市郊,相對地冇咁容易擴建。迪士尼附近既土地亦好容易因為主題公園而使其價值上升,佢要擴建既成本會好高。我諗左好耐,諗究竟佢點解可以擴建,迪迪尼究竟有乜野地方可以容許佢興易擴建。比較過當年既相片同今日既遊樂場地圖後,我發現原來而家既某個部份原來係當年既停車場黎,咁,亦都解釋左點解無端端呢度會有個七層既停車場。同理,呢度既迪士尼要擴建,過程都係好簡單,就係移走停車場,變成其他用途,咁就搞掂。香港迪迪尼時常俾人話佢地方細,但,佢又可唔可以咁做呢?

六、Fast Pass。好得意既排隊理論。理論上佢係maximize緊我地玩機動遊戲既utility/minimize用黎排隊既時間,但,要慢慢諗下,將另文再述。

七、地底。同樣地因為場地唔夠大既問題,呢度好善用佢地既地底黎做機動遊戲。也未嘗不是一件好事。因為,好多遊戲都要响漆黑既環境進行,咁先可以配合到燈光效果,天上既明光入唔到地底,係一個製造黑暗既好環境。如果可以善用地底,個公園可用既面積就大左一倍。之但係,香港既迪迪尼係填海填番黎既,都仲未沉降完,佢既地底又係唔係咁容易用到呢?

八、主題公園八點就收皮。但係外面既商店就開到兩點喎。點解呢?好明顯,入場費就係一早已經俾左,佢七點閂門同九點閂門對佢既收入冇乜分別,但係商店就唔同啦,一日有人買野,一日佢就有得賺,咁,就梗係想愈開愈夜啦。

九、每個機動遊戲既出口都有一個紀念品店,佢,簡直係不斷提醒你消費消費消費⋯

十、兩日黎排隊時諗過好多野,一時間未得閒寫低曬全部。挑。一開頭就話唔諗迪士尼點剝削勞工,倒頭來又不斷諗佢點搵錢。不過呢,迪士尼咁勁,就算係覺得佢好有問題,但點解佢可以咁成功咁推銷佢既商品。佢既成功,梗係有原因。佢既運作手法,都好值得留意同學習。

廣告

9 回應 to “她約我去迪迪尼”

  1. cheryl Says:

    你有冇去埋california adventure? 我覺得最想死係玩tower of terror,其餘時間都好無聊,去ariel’s grotto同d公主social,我真係唔係好想佢哋行埋嚟。

    乜閂8點咁早o架咩又??? 佢唔係12點放煙花o架咩????

  2. Lo Says:

    5/29 打,佢屋企,因為我宿好似埋尾打蛇在即,唔多方便。

    你得唔得(日子上面唔好意思要你地就下我喇)?

  3. 70/F Says:

    > maximize緊我地玩機動遊戲既utility/minimize用黎排隊既時間

    衣樣
    我曾經同人拗到呢

  4. Justin Says:

    Cheryl: 有呀!Ariel’s grotto???乜黎??
    我反而好鐘意space mountain,我覺得裏面好靚。於是,我玩左四次。

    Lo: 好。就廿九號。但我要傍晚先得喎。

    70/F: 拗咩先?等我諗清楚,再寫出黎。

  5. Lo Says:

    好, 就 29. 時間到時話你聽。

  6. 野孩子 Says:

    印象派摩天輪呀~~

    去玩就要專心玩,唔好浪費左D 入場費。
    去考察先好諗呢D,因為通常考察唔使自費。

    要諗呢D問題,
    你畢業後諗到你白髮蒼蒼都重有得你諗~~ XD

  7. cheryl Says:

    space mountain 挑~ 等我以為好驚添…. 點知係得個快字囉。以前細個就對廸士尼好有憧憬,而家真係咩興趣都冇喇,去過一次都夠(要我俾足就真係唔會去,我係有朋友係employee所以半價) 其實最驚係去magic mountain囉… 你又有冇去? ariel’s grotto 係餐廳,有好多公主係度掩掩揚揚好煩。

  8. Justin Says:

    Lo: Good!

    野孩子:幅相呢,係摩天輪既倒影。
    嘿,我恨不得有人俾錢我去考察呀!!!

    Cheryl: 我玩完都挑左一聲。細個時人人都講到space mountain幾咁勁,等我一路排隊一路驚。之不過,space mountain裏面真係好靚喎!
    Ariel’s grotto就冇去。
    另,Magic mountain又係咩黎???

  9. cheryl Says:

    MM係一個玩到好辛苦嘅地方… 因為除咗ride,都係ride,冇d低b嘢緩衝一下,周身骨痛(加失聲)。

    LA果個係Valencia。你有時間又愛玩就去吓喇… d世界性手屈一指嘅ride都有好幾個喺果度。


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: