四代香港人 之二

2007/07/21

在關於第四代的文章裏,呂大樂以短短的一句作結:個性是個奢侈品。

距離大學畢業前的幾個月,我才發覺原來自己有的選擇多的是,可以升學繼續讀電腦,可以轉讀法律,可以到大公司大銀行找工作,可以到勇闖startup,也可以創業。

家人每每擔心我畢業後的去向,也常談及我的未來的路。不禁黯然。面前可選擇的路多的是,但,就是因為有太多的路,使我無所適從。每當跟人談起自己去向,討論很快會回到根本的問題—到底我的興趣是甚麼?我究竟想過一個怎樣的生活?每當別人問我自己最鍾意的工作,我不懂答,而時常只會推說我喜歡好玩有挑戰性的工作。那,其實就是我最大的問題。呂大樂同樣地指出第四代人普遍都有這個問題。

我不知道自己喜歡甚麼。

而事實上我很清楚自己喜歡甚麼。

我有虛榮心,我喜歡別人的讚賞,我喜歡勝利,我喜歡成為領導,我希望得到別人的認同。我希望得到更多人的認同。然而,怎樣才能得到更多人的認同,怎樣才能成功,就沒有一套固定的法則。

小時候玩過很多數學比賽電腦比賽,得過獎,得過別人的讚賞,這驅使我努力地繼續參加其他比賽,但並不代表我對這些學科較同齡的小朋友有較大的興趣。一直以來不斷的學,是因為它帶給我榮耀,並且,它是在綜多不同的學界比賽(如運動、音樂)裏,是成本效益最高的,不用花太多的氣力,就可以獲得理想成績。參賽多了,會約略感覺到評判的評分標準,或者是知道較容易獲勝的項目。刻意去選擇容易的,低成本,效益高。

我很清楚,自己遠較其他同學對電腦的興趣低。因為勝出了香港的比賽後,就有機會參加國際比賽,可是要在國際賽得到好成績,要多花很多很多時間和精神,熱愛電腦的隊友們時常在努力的練習,他們在切磋在討論,而我卻覺得悶,因為要付出太多才能有點點收獲。我計過度過覺得不化算,與其去做個computer geek,倒不如做個快快樂樂的正常學生,多參加聯校活動,盡力吸引其他學校的女生罷了。

我只知道自己想威想認叻想別人覺得我與眾不同,可是除此以外,我不知道自己喜歡甚麼。

如呂大樂所言,第四世代的人,他們知道別人需要甚麼,可是,他們最缺乏的,是自己的個性。

廣告

10 回應 to “四代香港人 之二”

  1. 羊狼二世 Says:

    我係八一年出世,都叫第四代卦。

    成日覺得我地呢代唔夠獨立同埋處事動機好易被外界牽引。例如我自己讀書好,就會放心機落去讀,邊科成績好就專攻邊科,唔會問自己係咪真係有興趣。

  2. 熊貓王 Says:

    我諗,只係無以前咁實在,同埋無咁容易達到自己的理想。
    或者點講?最早一代係專心搵錢,唔理做乜,搵到錢就得,目標係明確而簡單的,唔駛理甚麼價值、個人自尊等,佢地話第四代唔吃得苦,關鍵係其實佢地本身對於「苦」的敏感度極低。
    但到了第四代,我們不需要愁溫飽 / 住屋等問題,所追求的東西已經唔同晒。價值上的追求例如自尊心、自由度、自主性、成就感、認同感、同事關係等,與以往單一價值--「錢」,大有平起平坐之勢。
    第四代的生活方式,根本唔可以用之前的價值去衡量,例如夜訓遲起唔代表唔勤力或者無規律等。同事,大家個理想生活方式都好唔同,家陣年輕人的「理想」多左,尤其是果堆跨媒體文化人,雜誌、電影、專欄、講座、教書、寫blog、電台節目加埋畫展同搞唱片,每樣搵得果少少,全部散工,做到唔高興dry dry地就全部請假去三個禮拜旅行,響上一輩眼中,呢種叫「唔定性」,但響第四代眼中,有齊上面所講,才叫生活質素。

  3. gordon Says:

    兩睇
    你亦都可以話我興趣太少太摺,所以咁快就決定一定係做金融呢行,就算連行頭唔係太清楚多好,仍然係仆到去試,仆到去做

  4. Justin Says:

    羊狼:同意呀,外界太多鼓勵去驅使你做一樣野,得到一些甜頭,就會繼續想去做,久而久之,就發覺自己冇乜真正鐘意既野。

    熊貓王:係囉。今時今日,人人都覺得錢唔係唯一既價值,或者係,如果你話自己淨係鍾意錢,就會俾好多人罵。就會不得不諗下自己真係鐘意乜野。

    Gordon: 夠膽去試,永遠都是好事呀!!

  5. 野蠻郡主 Says:

    你好呀﹐我想我都係屬於唔知自己想點既人!太過溫室,只鐘意隨心,太過幻想化…希望快d了解到自己既專長去成就個人既事業!

    不過知道自己唔鐘意d咩…變相…其實鐘意個d都好少…哈哈哈!

  6. 垃圾仔 Says:

    其實掉返轉講, 而家我地如果可以清楚知道, 自己唔鍾意d乜野, 就已經好好.

    呂大樂所指冇個性既人, 我估大概就係連自己唔鍾意d乜, 都唔知道既人.

    問題係, 古往今來, 真係可以將興趣同職業完全overlap既人, 真係好少. 呢個唔止係我地呢一代既問題. 我其實唔信上一輩人淨係鍾意錢. 只係佢地窮得太耐了.

    而家我自己睇第四代, 最大問題就係佢地連自己唔鍾意d乜都唔知, 或者明知自己唔鍾意, 但因為犬儒, 因為無力感, 所以都唔出聲唔反抗.

    至於興趣既野, 唔實踐點知道自己興趣o係邊? 所以, 另一個問題係, 第四代既人太被動, 好多野想試想做, 但係最後唔知點解, 一概冇實行. 第四代人既行動能力其實比較低.

    好初步既諗法. 諗得清楚d, 再o係自己blog度講.


  7. >所以, 另一個問題係, 第四代既人太被動, 好多野想試想做, 但係最後唔知點解, 一概冇實行. 第四代人既行動能力其實比較低.

    無錯,好似我做義工時果班學生,討論時就好多idea,叫佢地落手落腳去實行就無尾飛陀.

    所謂吹水唔抹咀,即係行動力低,原因可以好多,例如無自信,唔夠獨立(去找出或嘗試第一步),或者練精學懶(即係計過度過成本效益先去做),呢幾方面我覺得好睇父母俾唔俾到身教.

    >我很清楚,自己遠較其他同學對電腦的興趣低。因為勝出了香港的比賽後,就有機會參加國際比賽,可是要在國際賽得到好成績,要多花很多很多時間和精神,熱愛電腦的隊友們時常在努力的練習,他們在切磋在討論,而我卻覺得悶,因為要付出太多才能有點點收獲。我計過度過覺得不化算,與其去做個computer geek,倒不如做個快快樂樂的正常學生,多參加聯校活動,盡力吸引其他學校的女生罷了

    說穿了,你係為左個獎,有如踢波,你三流技術,對業餘隊可能予取予攜,但係要你升班打乙組,成日要練波又唔係必贏,咁就情願唔升班好過.咁,呢d個人價值取向,本來無乜可以批評,但係個人覺得一來唔係英雄所為,二來其實獎項其次,經驗同見識自係重點law.

  8. Justin Says:

    野蠻:唔知你有冇呢個感覺,就係,呢一期以為自己好鐘意好鐘意一樣野,但,過左一排,又發覺原來覺得好普通。超煩。

    垃圾仔:關於你講犬儒,所以人們覺得唔岩都唔出聲。我又覺得,同樣地,大人們都覺得有青輕人犬儒(cynical),因為佢地乜都走去反對。

    魔術師:對呀。細個時做好多野,都係為左個獎,都只係為左令到人地讚我。而家大個左識諗少少,先覺得學野既過程都好重要。但係,對於一個細路,仲未識分咩係重要咩係唔重要時,攞到獎,咪代表威,就係佢做野既動力。

  9. 垃圾仔 Says:

    家陣人人都講犬儒. 但係咩叫犬儒, 我諗鬧人犬儒既人都唔係好知.

    我未真真正正讀過犬儒主義, 所以唔扮權威啦. 不過我覺得, 犬儒係一種未經思考就妄下價值判斷, 或者逃避一切價值判斷既狀態. 乜都走去反對唔一定犬儒, 可能真係因為呢個城市實在太多野需要反對. 如果係咁, d老野話人犬儒, 本身就係一種極犬儒既行為.

    同理, 因為價值判斷太複雜, 或者現實不容許, 所以不作判斷, 都係犬儒.

    in this sense, 我都有d犬儒架. o係香港, 唔犬儒, 真係唔知點生存.

  10. 熊貓王 Says:

    純分享下,搞笑版的維基百科有這麼一段關於犬儒主義的:

    犬儒就是 know the price of everything but the value of nothing.


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: