天水圍十二師奶

2007/08/04

Image of 天水圍12師奶 

天水圍十二師奶

昨晚一口氣讀完十二位師奶的故事,唔知點,總覺得怪怪地,那,不是一向在我眼裏的香港。

她們月入四五六千,扣去了交通飯錢交租錢,所餘無幾。有時家裏還有個不濟事的丈夫,或者巨債,又有幾名尚未出身的兒女。她們天天死慳死抵為了省下十元八塊,讓初中因為遲了起步,所以跟不上學業進度的孩子,上補習班/請私人補習老師,就算如此,也只夠錢上考試前一個月的補習班,孩子往往只能僅僅升班。而從另一面看,私人補習算是大學生其中一條最重要的水喉,胡謅一小時就可以穩袋百幾二百,如果學生的父母個醫生律師會計師,當然毫無問題,但如果那是他們節衣縮食省下來的,心裏總有點戚戚然。百幾二百蚊,到尖沙咀銅鑼灣走一轉,剎那間就花掉。


在香港,欠了張大學畢業證書,可說沒有出路。她們很多在大陸居住了好一陣子才到香港,以前的工作經驗和學歷在小城裏又不獲承認,只能從事最低技術的工作。每天長時間工作後,只換來點點收入,身體不好之餘,冇人冇物,朋友不多,沒有傾訴的對象,精神也長期受壓抑。小城裏要脫貧非要砂紙不可,然而去讀書去進修都要時間要精神要毅力,但,她們口袋裏沒有幾個錢,餐搵餐食餐餐清,又可來時間與精神?我生活圈子裏的、一班十幾廿歲的人,從來都是這個制度的受益人,就算是會考高考肥了一次兩次,我們都有機會重頭來過,頂多是比同齡的慢了一點點,永遠不會覺得自己沒有出頭的機會。但對於師奶們,她們會把希望寄托在子女上,但是,過長的工作時間剝奪了跟子女相處的機會,那個年紀的小朋友如果缺少了照顧就很容易學壞。於是,連下一代的寄望也失去了。
她們想的是子女能生生性性,就算讀書不成也要學會一技之長,可以找份安安定定的工作。相對地,在自己身邊的同學都畢業了年多兩年,人們都在計劃讀CFA,CPE,JD,MBA….動輒幾萬至幾十萬的課程,但仍然擔心著將來會被淘汰。

讀畢,心裏戚戚然,在自己覺得這個世界依然處處是機會之際,竟然,不遠處有些跟自己望著同一片天空的人,正艱苦地過著沒有出路的生活,這個,不是一向在我眼裏的香港。

廣告

11 回應 to “天水圍十二師奶”

  1. gordon Says:

    天水圍同屯門都好多新移民,因為物價相對出面平好多,區內食個晏從來都不大可能會超過$25,$15以下亦大把選擇,我讀緊中學ge時候每餐從來都唔會超過$20,有時候去街市買$3炒麵已經食得好飽,所以真係可以好慳

    係我隔離有條邨係中轉房屋,我就見過一間得一百呎ge房la,連床都擺唔到,只係擺到床褥,跟住就一個衣架,一張摺椅,一部plasma,之後就乜都擺唔到la,連台都冇…月租300,死未

    btw CFA,我都開始猶疑有冇時間讀…

  2. 惡女 Says:

    我其實都係喺大學時代
    先開始認識呢個世界
    我就係喜歡你觀察力強
    有同理心

    好多野想同你分享
    見面再傾

  3. tit fu Says:

    畢竟香港作為一個繁榮的國際大都會,出現貧富不均的情況其實係代表香港有問題。可是,似乎現在的經濟結構卻只會助長這個情形愈來愈嚴重。只係一個危局。以前,我都會以為我們的福利制度可解決這個問題,似乎又唔係?

    貧窮只會世襲化。

    現在最大的問題係窮人不能對將來有希望。

    也許,最有資源的大學生可以做d o野。從投資角度,我們可以由教育著手,入去天水圍幫幫手。

  4. Justin Says:

    Gordon: 嘩。一百呎,真係好好好細。btw,你最近點,搵你食個晏吖!

    惡女:謝!記住早啲發老脾放工喎!

    鐵夫:除非小朋友們識得諗,如果唔係佢地真係好難脫貧。
    唉,但係,另一個出現响我腦裏面既問題,就係,做乜野要幫佢地。我而家享有既福利,去老麥咁平食個餐,豉油街碗碗雲吞面都係十蚊,其中一個好主要既原因係香港有一班人工低得好緊要既人。同時,政府提供唔多福利,所以可以少抽我地稅,我當然覺得冇乜所謂,就是苦了一些冇我咁幸福既人。要從自己個袋裏面拎錢出黎幫人,從來都唔係一件容易既事。

  5. c Says:

    我都係住在呢區附近
    令人心酸既事實在太多
    香港其實有無數個天水圍12師奶
    自己家境都唔係好
    但我知道佢地更慘

  6. tea Says:

    我買唔到四代香港人
    @0@!!!

  7. samsarablog Says:

    我好鬼討厭d人坐在冷氣房BS乜野堅尼系數點計同其實無乜升,又話香港乜貧窮問題,唔應該有最低工資。唔該去d舊區新巿區睇下d人幾慳,有幾多老人家執紙皮!!!

  8. gordon Says:

    冇工返la,不過暫時都係好忙,要過左ocamp先,遲d再搵你la

  9. Justin Says:

    C: 係囉。我有時會覺得自己唔夠好,但,事實上,有更多人較自己不幸。

    Tea: 我琴日响序言書室見到一本,知唔知序言响邊?

    Samara: 唔使舊區新市區啦,淨係睇下每棟甲級寫字樓既清楚工人响邊度食飯(我見過佢地响後梯,鋪張報紙坐响地下食),已經夠曬。

    Gordon: 好!

  10. 余若虛 Says:

    香港呢啲咪叫轉型成為知識型經濟社會囉。知識型經濟喎,咪即係沙紙文化,乜野都要考試。大學畢業唔在講,做證券、做保險要攞牌,做扎鐵、做水電要攞牌,連做看更都要攞牌。無計,社會越黎越需要一啲野去證明你係做到啲咩,再唔可以任你講就係。

    至於最低工資,一講又沒完沒了架喇,唔好提好。

  11. incomplete Says:

    成本書最令我放不下旳是… 見文之時, 她們既情況不單未有改善, 還惡化起來…

    有人身體變差, 有人最後都丟掉家庭,工作; 在職貧窮變問題變本加厲… 情況實在令人擔心呢… ~><~


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: