大運河

2007/12/30

聖誔節幾日,到了紐約,在Rockefeller欣賞了跟中環太子大廈外那裸幾近一樣的聖誔樹,到Wall找那隻舉世知名給遊人團團圍著拍照的牛並悄悄地告訴牠我在大牛市裏竟然輸錢,吃過兩餐久違的港式廣東菜,光顧了一分鐘賣廿杯咖啡的老星,搭了無數次地鐵,跟一位貌似杜可風的好好先生吃過茶,見識過曾在一頓飯裏打瀉兩杯水的小女孩,其餘的時間,都在友人家裏。

友人來美多年,家裏有幾百隻vcd/dvd,呢期入了無線八十年代的重頭劇「大運河」,有黃日華梁朝偉陳玉蓮劉青雲吳啟華歐陽振華秦漢等等我認識的花旦小生,劇集背影是隋朝至唐初。自上預科以後,我已經開始沉迷於網上溜連,好少睇電視(最多都係睇youtube同土豆),已經久違左無記既劇集好耐,出國之前,間唔中喺屋企食飯,電視播住既劇集已經好少吸引到我既注意,近年最有印象既大概係黃子華既《棟篤神探》同埋《金枝慾孽》同埋《糖心風暴》,其餘既,都唔係幾記得。

呢套《大運河》都可算係大製作,朋友睇過佢既製作特輯,話當年佢地係番大陸取景既,大家諗下一九八幾年既大陸係咁境地,以我依稀既印象,果時(已經係九十年代初)既深圳仲係一腳牛屎既不毛之地,上到北京買紀念品仲係要去友誼商店用外匯劵既,的士司機竟然未聽過香港呢個城市,家母唯有話自己係個响廣州做小買賣既小資,記住,果時已經係九十年代,八幾年既大陸都可想而知係幾咁落後。

無記上去拍劇,取境既地方一定冇可能响大城市度,去到荒山野嶺連水連電都冇,隨時要自己帶埋發電機上去添,仲未計開飯同埋住宿連埋臨記既問題,我唔知係唔係香港電視史上第一次上大陸拍劇,但,果時有勇氣做呢樣野我己經好appreciate佢地。

睇番二十年前既劇集,唔知係我個人大左,定係真係個社會唔同左。而家既電視劇,角色既忠奸好似冇咁分明,亦都冇咁易估,相對地,我睇大運河既時候,每當壞人出現,個背景即時變左做一啲比較吊詭既音樂,演員又要做一個超級誇張既奸樣,驚死觀眾唔知佢係個奸角咁。有時候又要左大量既無謂對白去交代一些好顯然易見既情節,畫公仔畫到出曬腸。但同時,响字裏行間,發覺以前既對白精彩過而家好多,我覺得某情度上係因為而家廣播條例比以前緊左,尤其係响黃金時間裏面既節目,所以粗俗少少既對白而家完全唔出得街;但係當個角色係一個連字都未必識寫既粗人,佢地講野又點會係好學識淵博武功高強既虬髯客咁文皺皺?

另外,點解啲宮女可以咁樣衰?話曬呢套都係當年既大製作,運得咁多器材咁多星級演員上去,點解唔運多三幾個比較睇得既宮女?

但,一路睇一路就recall緊我讀中史時既苦況。記憶裏只係有隋煬帝開過條大連河,佢有個friend叫宇文化及,係做過咩就完全唔知,亡國既原因都莫過於係個皇帝昏庸無道同埋天災連年。果時讀中史係令人最想死既一科,又悶又多人又多重覆但重覆得黎又有少少唔同,考試問親X代亡國原因基本上全部都係亂吹出黎。呢幾日匆匆咁睇左廿集大運河,起碼,我都輕鬆地記得有楊素楊廣李淵宇文述宇文化及社伏威等人及其事蹟。

點解,中史教科書唔可以寫得生動有趣些少?又,點解etv唔可以搵tvb拍,起碼,吸引到我既注意力先啦。

廣告

11 回應 to “大運河”

  1. 癲狗 Says:

    隋煬帝嘅歷史評價好似荒淫無道

    唉… 我d中史都還番哂比missy lu

  2. Yun Says:

    > 每當壞人出現,個背景即時變左做一啲比較吊詭既音樂,演員又要做一個超級誇張既奸樣,驚死觀眾唔知佢係個奸角咁

    哈哈﹐勁笑囉。

    嗯﹐聖誕應該去D冇咁凍既地方丫嘛。 😉

  3. gordon Says:

    以前d劇演員ge動作真係幾浮誇,等於我依家係亞視睇1981年版ge大俠霍元甲都係一樣,或者係依家d劇比較現實化者,有好多野都冇咁畫出場ge時候,精境ge對白自然就少

    btw以前我好鍾意讀中史d,成本書羅黎當故仔咁背,反而唔覺得悶ge原因,亦可能你因為睇電視睇得多,自然有興趣

  4. Learning_Forest Says:

    風塵三俠…
    虯髯客傳…
    紅拂女…

    好似無秦漢噃…係咪秦沛或秦煌…
    還有藍天…
    好好睇0架…;)

  5. 垃圾仔 Says:

    1. 如果對比五六十年代既張活游/姜中平, 或者舞台劇, 八十年代既演技已經好唔誇張架啦. 至於而家既劇, 基本上我都唔係好知d人識唔識做戲. 但係有一樣野依然冇變, 就係無線當d觀眾係白痴, 咩都要用對白交代.

    2. 如果你睇過清朝宮女d相, 你就知其實d宮女醜d, 係比較寫實的. 唔好話宮女, 皇后都可以醜到無倫. 搵下隆裕皇后同瑾妃d相睇睇啦.

    3. 宇文化及完全同隋煬帝唔friend囉. 係佢殺隋煬帝架喎. 而且非常殘忍. 隋煬帝話自己一國之尊, 要死得有尊嚴, 想飲毒酒. 宇文化及結果係搵人用條白絹監生勒死佢. 煬帝死之前仲要睇住自己個仔 (十二歲) 俾人斬死.

    4. 八九十年代我唯一覺得好睇到要追既無記劇集, 係. 對白精彩, 人物鮮明, 張力極強. 不過絕響啦. 而家邊可能有人夠膽拍掟人落街既戲?

  6. 垃圾仔 Says:

    點解冇左"大時代"三隻字?! 上面第四條係講"大時代".

  7. kenka Says:

    歷史係下一朝既人寫, 煬帝係寫衰左架. 佢開果條大運河, 有唐一代都靠佢唔少. 不過壓榨得太厲害亦是事實.

    至於皇后果一類通常都係政治婚姻, 唔荒好樣得去邊, 還有因為挑選的時候要以能生男丁為第一優先, 所以果d女人唔會"女人"得去邊, eg. 陳振聰個老婆果隻就係啦.

    要學歷史不如從演義故事入手, 但咁樣又會被史學家認為係唔真實, 係逼到學生個個要似佢地咁悶. 所以都係睇天子傳奇好過啦…

  8. 余若虛 Says:

    煬帝弒父殺兄,本來就得位不正。他為人極聰明,係父母面前表現極其樸素,促使父母廢兄楊勇太子之位,然後弒父殺兄奪位,登位就窮奢極侈。楊廣本就極聰明,文韜武略皆精,可惜心術不正,所有優點都成缺點。楊廣濫殺大臣,宇文化及同佢既手下都感受過生命危險,落手之時當然唔會仁慈。

    開運河佢係有功勞,而且隋朝國力極盛係無問題。但連開多條運河、建宮殿,仲連年征戰,淨係高麗都打左三次,再強大既國家都會被拖垮。咁同秦始皇起長城無乜分別。

  9. mysassyhime Says:

    我都有諗過etv如果平時電視咁做..我背到滾瓜爛熟..咁就會高分啦!

    可惜可惜…

    不過以前d片真係幾好,粵語殘片..古裝都好攪笑…
    仲要有白骨精…超攪鬼!

  10. ocding Says:

    hey bro I should have found you on Christmas Eve, i stayed in Laguardia airport for the whole night…

  11. Justin Says:

    癲狗:响劇集裏面既佢都一樣係咁。

    Yun: 而家,呢度真係凍死,負十三度。

    Gordon:電視的確係有趣過教科書超多。

    Learning Forest: 係喎!秦煌先啱!我好懷念「卡拉屋企」既佢。

    垃圾仔:皇后樣衰冇計,有時唔到皇帝揀。有也理由後宮三千都冇個靚?

    Kenka: 佢開大運河果筆,其實同秦始皇修城牆基本上係一脈相承,中國之後幾百年都係靠佢,同樣地,都係寫衰左囉。

    余:我覺得佢最大問題就係太過好大喜功。做基建梗係得,但千祈唔好學布殊咁係咁開戰。

    mysassyhime:講真,如果etv好似電視劇咁好睇,而家既學生又點會對歷史冇興趣?

    ocding: Ha!!! Laguarida!!!! Not near my place. I was in Queens.


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: