Archive for 二月, 2008

是但噏

2008/02/29

雖然話上次佢已經開始講到冇野好講,棟篤笑開得太密好容易江郎才盡,冇法啦,要搵奶粉錢。但係,佢改歌詞真係有一手。

廣告

馬料水大學計算機科學系

2008/02/27

諗左好耐都唔知改乜title好,是鬼但。

網上看見同學們慘叫erg2040c的課程艱深功課又多,助教們和教授又似乎唔理學生的苦況,想講幾句野。

交代少少背景先,我是馬料水大學計算機科學系畢業生,而家在美國羅德島讀緊研究院,我畢業時major gpa係3.3,係好係壞就見仁見知。

我都讀過erg2040但就唔係而家既教授教,所以無打算評論個別科目,但呢篇文係我對computer science整體課程睇法。

系主任呂自成教授好鐘意話香港學生並不比美國的差,佢話成個互聯網大部份既野都係由學生做出黎既,人地美國學生做到既野香港學生應該做到。當日我上堂時對佢呢種講法不以為然,覺得佢吹水居多,心底認為呢個係佢用黎justify佢果科沉重workload既藉口。如果香港既大學真係咁勁,點解美國啲大學又咁唔願收香港學生?我地既自我形象又點會咁低落?又點會硬係覺得浸過咸水既人好似勁啲?

黎到美國讀左半年書,見識過美國學生後,才發覺原來闖王所言非虛。

我身處既大學美國排名約二十名(我都知呢啲排名唔多可靠,但好過冇啦),唔太差咁,當然同MIT呀Berkeley呀差幾皮,同學們既質素冇佢地咁好,但都可以作一個參考。

相對我而家既同學,我真係發覺以前同我一齊玩果幾個同學既水平,就好似教授們所講,同美國學生比較,實在係過之而無不及。呢度研究院裏面有些學生,連好基本好基本既野都唔識,佢地既數學亦唔好。有讀緊博士既同學竟然用四日都寫唔出dijkstra,亦都有人唔知network有七層,又有人唔知graph coloring係乜野,呢啲當然係極端既例子,另一邊廂好叻好醒既亦都有,但普遍黎講,佢地既能力並不如想像中咁勁。

以前响馬料水讀書時,從來都係等人地開始做功課,讓勁人們發現曬功課既問題同埋難關後,我先開始做,咁樣慳水慳力。有咩問題喺實驗室問人,九成九問到答案。當年比疏屎我參考既人,佢地既能力一定比我而家既同學好。今日,我由一個會抄疏屎既人,變成會教人做功課既人,呢一種身份地位既重大轉變,你就可以知道美國既大學生未必係大家想像中咁勁。

所以我覺得教授們將啲野教得深,當同學們係美國頂尖大學既學生黎教其實都唔出奇。如果有良好既附助,真係可以教啲深野。更加上,考試呢樣野係拉curve既,就好似兩個人响森林度見到隻老虎咁,你唔使跑得快過隻老虎,你跑得快過另一個人你就唔使死。

又或者咁講,你話我賣花讚花香又好,做馬料水護法又好,自吹自擂都好,我認為呢個系畢業而成績唔太差既學生(如果功課都係自己做既話),佢地既電腦水平同埋普遍知識同埋襟捱能力,都一定有番咁上下,畢左業無論係讀書定做野,呢個系沉重既功課壓力對學生黎講絕對係個好好既鍛鍊。以前忙到死下死下時,望見其他系既同學日日都咁得閒媾女唱遊大世界,我心裏面都唔知問候過啲教授幾多次,點解我做到死下死下先得個B+,人地讀marketing走曬堂淨做兩次 present又係通派B+!但係事過境遷,轉頭諗番,唔係以前做到扒曬街,又點會練得今日一身好本領?

當然,同學們關心既可能係,既然workload一樣咁重,做埋同世界一流學府一樣難既功課,點解畢業證書係印住隻俾人舂暈左既大鶴而唔係MIT?點解阿劉同志吹左咁耐話要超英趕美做世界一流學府既時候,啲大公司大銀行仲係唔多理我地咁?如果個名唔同左,預報回報高左,同學們未必會咁樣喊苦。

(同刊於三月號中大學生報)

穿崩

2008/02/26

電影雙週刊裏曾經有一欄目,專門捕捉不同電影的穿崩鏡頭,有時一部電影竟然有二三十個,有時是某人的鞋不同了顏,有時是牆上的飾物無故失踪,每每驚嘆為何有人如些無聊,把一部電影重覆看三十次找來這些冇益冇建設性的東西,電影雙週又會癲埋一份另辟欄目,我又竟然會記得。

這段子寫程式寫得天昏地暗,但人愈忙就愈想做無聊事。把Moving on stage的dvd重覆煲了九十八次,竟然無聊得發現有穿崩鏡頭。

這是陳奕迅介紹樂隊部份,分別是Disc2的49:02和49:06,相中人是柯南和作浮誇的C.Y.Kong,留意柯南頭頂的web cam,四秒後竟然神秘失踪了。

eason1

eason2

STL quiz.

2008/02/25

Given A is a vector<int> with a sequence of integer.

int threshold = -1;
if (A.size() > threshold) threshold = A.size();

Indicate any possible error(s) in the above program segment.

徐靜蕾

2008/02/24
岩岩睇完投名狀,關於內容,又見咁多人寫過,遲下睇下有冇心情寫啦。之但係,最大既感受係,徐靜蕾好靚囉!

第一次真正留意到佢,係响《傷城》入面,佢戲份唔多,對白都唔多,但係佢唔使講野,淨係攞個樣响度,已經好有氣質。由頭到尾一直比佢吸引住,但又講唔出佢叫咩名,之後先知原來佢叫徐靜蕾。

《投 名狀》入面都係,佢既對白都好少,好多時候都只係拍佢望黎望去,唔知係唔係因為故事裏面佢係自小學習琴棋書畫,所以望落都特別唔同。佢千里迢迢咁上前線搵 老公果幕,即刻令我諗起《往事並不如煙》裏面康同壁既故事,康同壁係康有為個女,佢為左搵遠走印度既父親,女扮男裝由北京沿絲路入新疆經過帕米爾高原再南 下印度,章詒和形容康同壁係中國最後的貴族,飽讀詩書之餘又有無比勇氣。但,我又係認佢唔出,睇完戲再睇番個封面,睇下究竟邊個演員咁有氣質,嘩,原來又 係徐靜蕾,真係愈黎愈鐘意佢。

徐靜蕾果隻靚,係靚之餘仲要有氣質果種(鍾欣桐都靚,但係佢又天真又傻,中六既我就話吸引啫⋯⋯睇 friends我學識一個英文生字,呢啲叫"Empty Flask"),讀過下書(北京電影學院畢業,呢間野一定難入過精算同埋Gov&law,歷屆畢業生有陳凱歌張藝謀賈樟柯趙薇⋯)仲要生得靚,簡 直殺曬!

講完。

浮誇

2008/02/21

就算只聽香港演唱會的CD版,我也覺得Get a life較好。

在年初的頒獎禮,聽他的演出,筧得聲音較以前沙啞,有時flat了。這次演唱會,尤其是浮誇,感覺是他夾硬把聲音從聲帶裏擠出來的,唱得痛苦(當然,這可以解釋是他很不安怎去優雅的演繹方法,但我覺得唔係囉)。Get a Life裏以浮誇開頭,爆炸性強得不得了。家弟亦解悉說,這安排對歌唱者亦有好處,浮誇高音難唱,開場時聲帶還未開始疲累,這時候比較容易唱。(或者可以參考側田的第一個演唱會,那時他歌少,不由得他選,在命硬和好人之間,他選擇命硬開頭好人結尾,演唱會過半以後,側田開始聲沙,然而好人難唱,唱到半路他降了key)。今次把浮誇放在中間,並且穿上了那條大依,實難為了他。以白玫瑰開頭也太過平實。他的聲線遠比以前沙啞,想是表演太多所致,如果真的太累,或者,好應該睡一睡,不要太過破損聲帶。

演唱會

2008/02/20

才短短兩小時,曇花一現,上完頭盤前菜,就匆匆把主菜送來,還不及淺酌細嗜,便得要結賬離席。在賭場裏呆等幾小時,又花了幾十蚊,覺得理應獲得較以前買二百蚊飛的三倍興奮。短短的兩場,是香港版的濃縮,舞台小了,樂隊小了,舞伴少了,觀眾少了,歌曲亦少了。

習慣看八點半開始的演唱會,給濃縮至一百分鐘,自是很不習慣。座位半滿,幾乎是free seating,整場我都把腳放在前排的坐椅上。全是亞洲人,很久沒有聽過這麼多陌生人在旁說廣東話。陳奕迅盡量發揮,可是時差跟乾燥的天氣還是影響了他的表現。現場的音响也不好,但,才不過兩場,半滿的兩場,作客的又怎能有主場的要求?又或者,這裏沒有神通廣大筆鋒銳利的娛樂記者,發生甚麼事都不會上頭條,觀眾也較容易滿足,感覺比用積分換飛的903拉闊還要差。

也許我還是掂念著06年的Get a Life。

(其實要講的還有很多,容許我,緩慢的寫⋯⋯)

黑色幽默

2008/02/20

就是黑色幽默得很,但我始終不明白,為甚麼過了整整十四天才被發現?十四天裏,有大除夕年初一初二⋯⋯

%d 位部落客按了讚: