指指點點的第二代人

2008/03/30

呂大樂的《四代香港人》在網絡和媒體上都引起許多關於世代的討論。書裏描述長輩(第二代人)覺得生於七八十年代的第四代香港人,成長環境豐盛,理應很有成就,又憑多年人生經驗,對第四代人有很多意見。

他們出於善意的想法和建議,在我這一代人眼裏,是老氣橫秋的指指點點。不過終究他們最擁有社會地位和話語權,所以說話依然鏗鏘有力。最近我卻發覺,看不過眼後輩的行為,然後指指點點,是正常反應。

我在十多年前開始學電腦,大學讀本科時諗電腦,今天在美國諗研究院也是玩電腦。九十年代中,電腦還不太便宜,螢幕牛龜般大,互聯網也未普及。沒有發達的搜尋器,如果不懂用bbs就只有買書一途,願意硬啃昂貴的英文書還好,新技術出爐半年內就有很多有關的書籍,台灣出版的卻要等上一年半載。到黃金底層的書店打書釘,是每週的必然活動。初學者解決問題時要花很多氣力。然而,家父卻說他二十年前學電腦時,沒有我這樣幸福「可以擁有個人電腦」。他說當年他要先把程式寫在紙上,排期等用大學裏昂貴的主機。

我覺得今天資訊發達,懂得用Google就盡知天下事。早上推出的新技術,傍晚已經有很多詳細介紹和分析的網頁,而且不分晝夜地更新。電腦又平又快,介面亦愈來愈簡單,學電腦遠比以前容易。

可是,報載電腦科學系的同學覺得課程太過艱難沉重,問過系裏的助教,卻說無論工作量或難度都比以前低。今日的科技比幾年前成熟,就算是同等難度的功課,也理應較以前興鬆。於是心裏覺得驚嘆,科技發達使一切都變得容易麼?為甚麼今日馬料水山頭上的新鮮人,會覺得功課太多太深?心裏浮現的第一個解釋,是他們較以前的學生懶惰和容易放棄,亦會慨嘆「一代不如一代」。

這種語調似曾相識嗎?成長裏,為面前艱深的功課沉悶的課程喊苦時,得到的就是這種「現在的後生不捱得苦」的責備。現在,卻發覺自己成為了那個框架裏的第二代人,捱過了那沉重又艱苦的本科生課程,現身處於研究院裏,憑自己對學科的理解和經驗,我擁有相當的話語權。

一向很抗拒上一輩人過多的囉唆,如今才發覺,當自己有了發言權後,也會不自覺老氣橫秋地對後輩有很多意見。

(同刊於香港經濟日報)

廣告

13 回應 to “指指點點的第二代人”

  1. 許港生 Says:

    “一向很抗拒上一輩人過多的囉唆,如今才發覺,當自己有了發言權後,也會不自覺老氣橫秋地對後輩有很多意見。"

    同感。或許這就是孟子所說的"人之患,好為人師"吧。 :)

  2. 許港生 Says:

    更正:

    人之患在好為人師。 –《孟子•離婁上》:-P

  3. Justin Says:

    其實我好耐之前已經覺得自己有咁既毛病,岩岩升大學時,翻到自己中學,同啲師弟講野,又係响度指指點點,諗番都會覺得自己好煩。

  4. 垃圾仔 Says:

    即係咁, 如果一蟹不如一蟹係事實, 咁指出呢個事實本身其實冇乜問題.

    但係所謂一蟹不如一蟹, 都要睇好多背景既. 而家既大學生/中學生, 同我地以前讀大學/中學既時候, 面對緊咩狀況, 做老野既一定要了解.

    第二代鬧第四代之所以冇point, 在於佢地永遠用自己既遭遇去代入細佢地二十年既第四代.

    所以, 趁自己未真係好老, 多d了解d後輩, 真係好重要.

  5. C.M. Says:

    >>趁自己未真係好老, 多d了解d後輩, 真係好重要

    所言甚是。

    到老左,就更加要了解後輩…

  6. kenka Says:

    老鬼有意見沒關係, 不過要體會下一代的困難, 實屬不切實際.

    就算了解他們的難處, 也要靠他們自己去解決, 老鬼能做到幾多?

  7. Kris Says:

    我倒覺得有點不應這樣看學電腦。

    以前學,是有點straight forward的,知道學完A之後學B,慢慢做上去。沒有互聯網,學電腦必先由硬件學起,才接觸OS,再到programming software之類。

    現在學電腦是資訊太多了。幼稚園碰的是basic畫烏龜跟Apple II(!),小學第一樣學的已是中文輸入法,中學更開始學網頁flash,到中四五會考CIT才真正開始學hardware。所以到今天,programming學得有點上手,hardware卻什麼也不懂。互聯網資訊太多,不再是線性的學習方向,不知從何學起。我們都經常跳過底層的知識,而先學習上層的。多不等於好,若不懂處理龐大的資訊,就會變成more is less。

    也許兩代人處境都不同,很難說「一代不如一代」。

  8. winson Says:

    極同意Kris 既講法

    google 的確一沽就沽到十萬條訊息, 但係十萬條, 會唔會太多呢? 搵到既野多左, 自己要處理既野自然亦都多左…

    六年前學php 好潮, 六年後既php 變左常識…

    遲來真係唔係個個上到岸

  9. Justin Says:

    winson, kris:

    反而我覺得係咁喎,學電腦既其中一個最大問題就係你好多時會遇到一些奇難雜症之但係其實又好少事果啲。

    就例如你個program少左個semi-colon,於是就compile唔到,有經驗既人一眼就spot到你個program錯乜,但於初學者而言可能要花幾個鐘頭甚至幾日先知道發生乜事。php以前係好潮,但係六年前你setup個environment到你可以寫php都難過而家好多喎。六年後既今日php變左常識(雖然我唔識),都係因為容易用左,學習既門檻低左。

    我以前學既時候,好多時間就係浪費响呢啲subtle野上面。因為無論啲工具書幾咁詳盡,礙於成本問題,好難將所有有可能出題既問題放曬出黎。

    但係而家有左internet之後,基本上一個初學者會遇到既問題,網絡世界都有十九萬人已經遇過,好多時啲人會上網問,然後就有人答,所有資訊就係一點一滴咁累積落黎。

    所以我覺得係方便左好多。

    而家,相對於從前,一個文明人需要兼備既就係用搜尋器既能力。

    另外,關於學習方向。離開學校之後,基本上唔會有線性既學習方向。尤其是係電腦系統咁鬼複雜,我寫個網頁出黎你逐個step問我發生緊乜野事我都未必答到你,好多時都會係不明不白咁跟住網上既指示做,做得多,就會慢慢咁明白每個部份發生緊乜野事。

    同埋,top-down既好處係,你會有個big picture,你知道你做既野會有咩效果,你有興趣,就會想知埋細節。

    我覺得一代不如一代,因為而家既電腦比十年前容易得太緊要(我唔排除呢個係我既bias),真係太難理解點解三四年前我同我啲同學做到既功課,今日會有咁多人覺得好難。

  10. Justin Says:

    垃圾仔:如果我而家响馬料水,一定會試下問,究竟佢地覺得最大既障礙响邊。因為,真係唔容易理解。

    CM:我唔想老呀!!

    Kenka: 係囉!我又真係做到幾多?但,我最怕既係佢地唔想去解決。

  11. roy Says:

    以前的情況係,我有十個鐘,我就用十個鐘去睇手上唯一的書。十個鐘我勁的可以學到七八成。
    依家的情況係,同樣有十個鐘,我上google search ,萬九幾條,頭個板有一兩條中,睇完之後,好自然睇埋後面幾板,比較下,中間可能加插N段MSN search 東 search 西。
    而家的人無咁專心,雜務多左,學習同玩樂的工具重疊左!

  12. Kris Says:

    >中間可能加插N段MSN search 東 search 西。

    haha!講中哂
    做功課既同時,點可以少得msn?

    我之前都問過你幾年前同宜家比較,你覺得邊d學生水平高d嘛。我唔敢打包單,但就咁睇似係逐年下降。幾年前一樣既功課宜家唔識做,唔出奇。

    我都係覺得資訊越多,的確係更容易學到野,不過咪好似樓上咁講,容易分心囉。如果只係得一本天書,咁實會死鋤爛鋤到底,好難分心。宜家搵料,睇睇下就會睇左第二d野…

  13. Justin Says:

    Roy: Google搵野快過搵書好多喎!當然,令人心散又係一個問題。

    Kris: 逐年下降,其實都唔係新鮮事。當年我考pure math,我做左廿年past paper,睇住啲題目一年比一年淺,prove exactly一模一樣既野,愈黎愈多分,八幾年淨係比三分,去我到考果年已經變到六分。

    所以我都唔知應該怪學生定係怪個考試制度好,呢個簡直係雞先定蛋先既問題。


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: