曾sir兩面都是人

2009/05/14

朝早起身,何某問我看了答問大會沒有?不明所以,他傳來一條youtube。

短片標題為:「煲呔發表無恥六四言論 自稱代表港人 現埸市民怒叱 泛民離埸抗議」,我心想嘩阿曾sir你做乜咁蠢,乜何安達同劉細良沒有跟你補課麼?

整件事好明顯有組織有預謀。

先由溫文爾雅的吳靄儀議員發言大腳傳中,然後是公眾席和長毛小組滲入禁區,一輪門前混戰,最後由吳靄儀補多腳宣佈離席抗議拉隊離場。

每個人都恰如其份地做了他的分內事。

還以為翌日曾sir會登上生果報頭版,但,今日頭版竟然更是趙紫陽的回憶錄,內文更詳盡地揭露新書內容。

再讀一下幾份左報,「有預謀發難 反對派大鬧議事堂」、「一場有預謀的政治騷」⋯⋯

好像一件事件是有早預謀就代表罪大惡極。我想問發射火箭申辦奧運建設金融中心保八建立蘇區組織紅軍改革開放是不是都早有預謀的?抑或都不過是即興隨心的?

我想起許鞍華的《千言萬語》,有一幕她借飾演區議員的謝君豪口道出:「現在的社會運動不能亂來,跟政府抗爭要講求策略的」

如果唔講策略,例如由陳偉業開波、或者生果報未一早得悉趙紫陽出書、或者泛民沒有一早預定離席抗議,又者這又會是一場普通的答問大會。

廚房太熱,相信曾sir一早知道。回歸七年,他都好應該近距離目擊舊老細背脊中過幾多箭。鹿死從來是個死位,一旦明確表達,不是淥死就是碌死。礙於政治正確,曾sir當然不能明言支持平反,如果唔係隨時下個月就要腳痛落台。如果他心底裏確是支持平反,既然不能旗幟鮮明地支持,就唯有好很硬膠地反對。

禍從口出又非首次,頂多日後收回言論,起碼表明「我知我蠢,不過我夠忠心」,然後各大親建制傳媒自會懂得集體保密。另一個陣營又得到他們想要的sound bite。大家歡喜。

為官者,赤手空拳遊走在熱帶雨林裏兇猛的野獸間,保命已殊不容易,更何況是表達自己的立場?

曾sir今次示範曲線支持平反六四,足見其深謀遠慮、兩面都是人的政治智慧。

廣告

10 回應 to “曾sir兩面都是人”

  1. Says:

    我尋晚睇新聞,都睇到拗晒頭,為乜會無啦啦咁答呢?又仲要話「代表全港市民」(之後既『收回』言論仲極之假到暈)...暫時真係除左好似你咁講,係曲線俾泛民有位上之外,真係諗唔明...

  2. Justin Says:

    我都唔覺曾sir會咁蠢。話曬,佢都做左咁多年官,冇番咁上下又點升到呢個位?真係好唔明點解佢會咁爆肚。

  3. Adrian Tam Says:

    第一,我希望真係曲線,咁起碼呢個人仲係個人。第二,曾爵士都幾十歲,一時講左蠢說話都唔出奇,如果唔係又點解政務官要六十歲退休丫。

  4. Justin Says:

    好多時見到蠢事,真係會希望係曲線黎,咁先冇咁悲。

  5. Says:

    >一時講左蠢說話都唔出奇

    個問題係,今次睇片,佢唔似係冇諗就講(上次狗up嗰次就真係似真情流露囉);今次就唔似係一時衝動囉。

  6. Alex Says:

    Couldn’t he just say that he didn’t want to express his personal opinion on it? That’s his privacy, right? That’s better than giving an answer that’s not an answer.

  7. 垃圾仔 Says:

    呢條友既說話技巧同成龍差唔多, 一唔讀稿就出事. 都唔係第一次啦, 之前又狗UP, 又文革=極端民主, 又想窮都幾難. 我就直情覺得呢個人係人格有問題, 如果係正常人, 點會爆親肚都會爆到D衰野出黎.

  8. evaleung Says:

    佢係講真話,佢真係唔關心平唔平反六四。

  9. 強記小廚 Says:

    我想用番蔡東豪嘅講法,呢個議提太大,非小小特區裏的曾爵士能夠解釋得到。(佢更加未夠班解決呢個平反耶~)
    佢應該要諗下點繞過呢個詢問,免得下年再重蹈覆轍。
    ~強記小廚

  10. Justin Says:

    米:咁,都真係唔明佢其實係想點。

    Alex: 其實遊幾下花園都已經得。泛民好明顯一早預左離場,今次衰既係,佢比左句sound bite人。

    垃圾仔:佢講野真係唔太識轉彎。

    evaleung: 佢都係講真話。佢覺得佢可以代表到全體香港人。

    強記小廚:學阿范太個答法,再遊下花園,咪得。


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: