Archive for the '音樂' Category

嬅麗緣

2008/10/16

到今日還是很懷念華星與新藝寶的楊千嬅,自從她跟黃柏高到金牌以後,她的歌就不再是我杯茶。當然一個歌手的唱路總不能十年如一始終不變,從《少女的祈禱》到《姊妹》是個好轉變,可惜自《小城大事》起就開始覺得不倫不類。曾幾何時我一隻大碟煲足十隻歌,主打當然一聽再聽,就算是其他filler也一樣地煲完又煲。

陳浩賢(其實我以前沒有聽過這個名字)為楊千嬅填了首《嬅麗緣》,單看歌詞就覺得是《K歌之王》的楊千嬅版,歌曲的風格也像是華星的楊千嬅(大概是因為人山人海)。感覺有點像《八步半》,大概是因為六八吧。

邊聽邊數算著歌詞裏的歌,以及歌詞裏其他歌的詞。回想起自喜歡楊千嬅以來的總總,也感到黃柏高後對她的陌生。她是唱功從來不算得上好,第一次聽《體驗入學》時更覺得她走音而想立即換碟,可是漸漸下去卻愛上她的《愛人》與《花樣嘉年華》,喜愛她就是。

幾年沒有買過楊千嬅,對上一隻應該是《向左走向右走》,已經是六年的光景。六年間見她得的獎愈來愈少,較大的只有商台(很有造馬嫌疑的)的我最喜愛女歌手獎,覺得她走不出事業上的樽頸,反而拍電影較好看。黃柏高縱有點石成金的能力,紅了古巨基紅了側田,我卻覺得楊千嬅是他的敗筆。

煲了幾天《嬅麗緣》,走過了由《狼來了》開始十二三年的路,歲月長衣裳薄的青䓤歲月,到吻下來豁出去再到以後的陌生,但願楊千嬅可以像曾幾何時十年都長不大的twins一樣,回到華星的時代裏。

如可分身飾演自己

2008/10/11

itunes store有楊千嬅陳奕迅賣

2008/10/07

咦?!好似早果陣都未有的!

七月時,我只係响itunes度搵到my little airport。

有冇人知幾時開始itunes store有得賣陳奕迅既?

補多句:陳奕迅既似乎係國語歌居多,廣東碟好古怪,有get a life但係冇eason chan on stage。最多人download既都係國語歌,好明顯冇人响香港做宣傳。

然後怎樣

2008/07/12

這年來覺得陳奕迅有種「然後怎樣?」的感覺。

記得Moving on Stage演唱會間場的片段裏,他講過幾句關於準備演唱會的過程,他說零五年復出後,零六年有Get a Life,同期還有一隻由女兒做封面的Life continues,到那一刻,一切都很完滿。

U87和Get a Life是我最愛的大碟和演唱會,至今還時常煲著。零五年,陳奕迅整整潛伏了一年多,U87是平地一聲雷,夕陽無限好阿牛浮誇葡萄成熟時都好得不得了,我愛死了浮誇和葡萄成熟時的詞,該大碟還被時代雜誌選為亞洲五大值得買唱片。Get a Life也是太好太完美,編曲燈光舞台服裝全是一等一,歌曲的連貫性,段落安排與轉折都十分漂亮。

過了這樣的巔峰,實在有些不知何去何從的感覺。就如Moving on Stage,他說不如試下跳舞,他跳得不過不失,但這個實非他的強項。Listen to Eason Chan的幾首快歌都聽不下去,覺得太吵。

那大碟裏我喜歡的只有《時代巨輪》。急速的節奏,不斷的三連音告訴聽眾他「無能力嗌嗌嗌嗌嗌停」,似是個急跑的人的喘氣聲,快跑幾步就累得要慢下來,休息不到半拍又再要起跑過,就是怕「身邊觀眾便離座」。

《然後怎樣》是《時代巨輪》的反襯。無論是結他版或hidden track裏的鋼琴版,幾乎全無高低起伏,平平白白的一首慢歌,不帶半點高潮,晨光熹微,沿著長長的軌道慢慢走,軌道上沒有火車自然也沒有巨輪,在一片舉目無人的荒野慢蕩,停下或轉彎已無分別。終於等到曾幾何時渴望的一絲安定,才發現不用急著上路的感覺是如斯恐怖迷惘,甚至連迷途的膽量也失去了。應該跑的路都跑過,汗都流乾,然後怎樣?

又想起十年前的《反高潮》:如何留得住高潮?一招了太過少。靈與慾已升級了,怎可再跌落寂寥?

棟溝笑主題曲

2008/06/20

呢幾日狂煲呀,一睇就知中間果段係串農夫既風生水起啦。唔知係唔係因為大個左,定係對佢地期望高左,覺得呢隻唔係好好笑喎。一路對住歌詞,都唔覺得有咩食字位,最多都只勉強地有「係魚都釣」個「釣」字。

我同我細佬都超鐘意林敏聰加曾志偉,雖然佢地真係二十個無聊,但大家都同意完完係因為娘親以前唔比我地睇,仲要話洗曬錄左《開心主流派》既錄影帶。佢當年既解悉係睇得多果啲野會學壞。雖然我覺得佢地係用左好多諧音,但係作為一個出生於書香世家既五歲既小朋友又點會識咁多粗口,又點會related到佢地既諧音?加上佢對意識形態既控制又冇共產黨咁利害,成長以來其實已經唔記得左《開心主流派》既內容,淨係記得好好笑,所以每次見電視上面有林敏聰曾志偉就即刻仆埋個電視前面。九七年林敏聰單拖出左隻碟,叫《蘇格蘭場放暑假》,裏面有佢响超級無敵馬拉松既精彩片段:

蘇格蘭場非工業用國際線路自動溶雪16valve風油呔大包圍連雷射彩色洗衣乾衣腐食性氣墊毛筆、豆袋所用既袋係黎自巴西阿瑪遜河上遊所發現既一種格林威治黎克特製七點八級v8引擎兩氣袋十八世紀維也納降G大調坐枱掛牆反坦克電子點火雙窩輪自動除臭附隔塵網防霉功能袖裝隱形女裝口報鼻涕一pat⋯⋯

嘩,仲記得,唔怪得人人都話細個背書容易。無幾耐之後响某個場合度我跟家弟在家父既同事面前背上述既句子,佢啲同事就立即以為我地讀書好勁,那個時候家父只好苦笑。同時,入大學後,發現原來好多同年既同學,都識得背林敏聰,好明顯,呢個就係集體回憶喇。

My little airport

2008/06/13

是日也,到香港電台睇葉大作曲家比賽,內容就不多提多了,畢竟對陳奕迅以外的音樂不太有認識,十支曲全是當代的,聽不懂。

最重要的,是。我。見。到。MY。LITTLE。AIRPORT。呀。。。。。。

原本想找他們拍照,可惜,他們正在接受訪問。等呀等,要入場了,他們還沒完。真可惜。

無盡的夢遺

2008/05/31

完場時出盡九牛二虎之力埋去買野,唔知痴左邊條筯竟然淨係買左佢地上年出果隻碟而冇睇阿p本書《無盡的夢遺》(希望我冇記錯書名,夢遺就一定岩,但前面幾隻字真係唔太清楚),其實果時心裏面諗既係「挑!三十蚊本書仔!我睇自己個扑仲好啦⋯」,之後未夠一個鐘就已經後悔,三十蚊當係支持下佢地都好啦,呢啲小本經營既,可一不可再。同埋,睇下佢諗乜野,都唔錯吖!諗過番去買,但人地都好應該收左工。

如果有邊位聽日去睇我的小飛機場,可唔可以順手幫我買本,感激不盡。

五月頭買飛時,諗過好唔好買定諗煲定先。就好似陳奕迅演唱會咁,聽完第一個chord就知咩歌。但係諗落唔好,未聽過一個人既歌就去聽live既經驗應該好特別,响羅德島試過一次,但英文唔好,完全唔知佢唱乜,呢度既係廣東話,斷估冇咁複雜。講真佢地既歌藝麻麻,不過好鐘意佢地sweet到漏既歌詞。想享受第一次既快感。點鬼知都係唔掂,可能係個base太勁,如果首歌之前冇聽過,就幾乎聽唔到歌詞,所以,都係要買碟再聽。

再一次,如果邊位聽日可以順手幫我買本,感激不盡。

浪漫九龍塘

2008/04/29

我沒有到過九龍塘,史釗域道的百佳倒去過很多次,可惜都是跟雷小姐去。還記得第一次時,十分徬徨,打了電話給幾個爆過房的朋友,才敢手震震地推開那道磨砂玻璃門。才見識到甚麼是麻雀雖小,五臟俱全。唯獨係,時常客滿之餘,從來沒有在走廊上見過其他人。

很喜歡這首歌,道出了心底話。

二十出頭,血氣方剛,似是很開放,有甚麼不敢想?係唔敢做啫⋯

%d 位部落客按了讚: