中大環球商業好好嘢

零．上星期臉書廣傳兩則新聞：「十七名末代高考狀元所選的大學課程」和「馬料水大學電腦系同學勇奪國際編程比賽第八名」。

一．臉書不少人對這十七名尖子口諸筆伐，但於我看，他們都選讀環球商業系，對其他人來說，是件絕佳的事。

二．高考成績好只代表考試能力高。很多勁人卻未必考試能力。

二．一．零零年網絡泡沫爆破前，尖子都選讀電腦，拉高曬個curve。如果我早幾年出世，未必能輕易進入電腦系。

二．一．一．講左好多次，公開試的唯一意義是升學。唔係個個系都要五個A。尖子們入曬環球商業，其他學系就相對易入。芸芸學子，又可以少浪費精神在公開試上。

二．二．跟我同系同年畢業的同學朱某，現於矽谷任職地上最強硬件公司。他好很勁，碩士論文答辯時，他跟學系說唔得閒番香港，遙距用skype做presentation，那些論文導師呀教授呀博士呀，只好在太平洋的彼岸，馬料水的半山，對住個projector聽他表演。佢串得起，你吹咩。

二．二．一．不過，如果番到零零年，他的成績未必入到電腦系。

三．大學裏太多重要事要做，但又要維持某個水平的成績。

三．一．對於自己沒興趣的科目，我絕少上課，功課用聰明的方法做（所以朱某的存在尤其重要），考試只讀一日。如無意外可以B+。

三．二．如果跟讀書叻到爆尖子一齊考試，一定冇咁易攞B+。

三．三．再推一步，如果同尖子們同系，畢業時，我一定second-up都冇。

四．國際賽攞過獎，大把公司爭住請。

四．一．不過，矽谷科技公司的工程師，十個起碼六七個玩過／聽過呢類比賽，Google Apple Facebook Quora真係任你揀。

四．二．於攞獎同學而言，搵工確值得擔心，十九間公司俾offer，呢間人工高果間股票多，真係唔知點揀。

四．三．吾友謝某，幾年前得同一個比賽同一個獎，同樣地，Google、Apple任佢揀。

四．四．反而，閣下會考高考廿個A人地識你老鼠，美國學校一向通派A。

五．點解兩段新聞有關係？

五．一．參加程式比賽，是課外活動，同夜晚响宿舍搞野一樣，乃係自願參加，學校話知你。

五．二．閣下飛去台灣比賽，普通話堂你缺席照扣你分，功課依然要交，話知你代表學校代表香港。

五．三．攞全地球第八名，佢地背後所付出的努力，每星期坐底十幾廿個鐘。即係，每個星期比起其他人讀少十幾個鐘頭書。

五．四．幸好尖子們都選擇讀環球商業，跟據（三．二），佢地才可以輕鬆維持住成績，專心比賽。

六．結論是，讓尖子狀元們一窩蜂去讀環球商業，對其他同學來說，是好事。